25.03.20
Түркия “Кыргыз-Түрк достугу ооруканасын” коронавируска каршы күрөштө пайдалануу үчүн Кыргыз Республикасынын Саламаттыкты сактоо министрлигине өткөрүп берди.
Түркия Республикасынын Кыргызстандагы элчилигинин басма сөз кызматы тараткан маалыматта, коронавирус (COVID-19) эпидемиясына каршы глобалдык күрөштүн жүрүшүндө мамлекеттер ортосундагы өз ара бири-бирин колдоолор абдан маанилүү экендиги баса белгилеген. Түркия элчилиги тараткан маалыматта: “Акыркы убакта коронавирус (COVID-19) эпидемиясына байланыштуу кырдаалга жараша, Бишкек шаарында курулган «Кыргыз-Түрк достугу ооруканасын» биз коронавирус (COVID-19) эпидемиясына каршы күрөшүүдө пайдалануу үчүн, Кыргыз Республикасынын Саламаттыкты сактоо министрлигине өткөрүп бердик. Кыргызстандык бир туугандарыбызга ден-соолук жана тынчтык каалайбыз” - деп айтылат билдирүүдө.
Түркия Республикасынын Маданият жана туризм министрлигине караштуу Түрк кызматташтык жана координация агенттигинин (ТИКА) Бишкектеги координаторлугунун көмөгү менен бул жылдын ичинде курулган оорукана, заманбап медициналык технологиялар менен жабдылган.
