24.04.24
Президент Садыр Жапаров мамлекеттик иш сапары менен Азербайжанга келди. 24-25-апрелдеги иш сапарынын алкагында мамлекет башчысы Азербайжандын президенти Илхам Алиев менен жолугуп эки тараптуу жана көп тараптуу кызматташтыктын актуалдуу маселелерин, ошондой эле мындан ары өнүктүрүүнүн жана натыйжалуу өз ара аракеттенүүнүн келечегин талкуулады.
Чектелген курамдагы жолугушуудан кийин, президенттер Садыр Жапаров менен Илхам Кыргыз Республикасы менен Азербайжан Республикасынын Мамлекеттер аралык кеңешинин (МКК) экинчи жыйынын өткөрүштү.
Илхам Алиев Садыр Жапаровду жылуу кабыл алып, мамлекеттик сапардын жыйынтыгы өлкөлөр менен элдердин ортосундагы бир туугандык жана достук мамилелерди мындан ары да чыңдоого кызмат кыларына ишенимин билдирди.
Азербайжандын президенти эки тараптуу жана көп тараптуу форматта кызматташууну өнүктүрүүгө эки өлкөнүн мамилесинде толук бирдейлик бар экенин баса белгиледи.
Илхам Алиев ошондой эле эки өлкөнүн тиешелүү министрликтеринин өкүлдөрү дайыма байланышта болуп, активдүү өз ара аракеттенип, эки тарапты кызыктырган бир катар маселелер боюнча үзгүлтүксүз консультацияларды өткөрүп жатканын белгиледи.
Кыргызстандын президенти Садыр Жапаров өз кезегинде, Илхам Алиевге жылуу сөздөрү жана салттуу меймандостугу үчүн ыраазычылык билдирди. Ал бул сапар эки өлкөнүн мамилесин тереңдетүүгө чоң түрткү болоруна жана бүгүн кол коюлган документтер кызматташтыктын кеңейишине өбөлгө болоруна ишеним билдирди.
Мамлекет башчы Кыргызстан менен Азербайжандын бардык тармактарда практикалык кызматташууга кеңири мүмкүнчүлүктөрү бар экенин баса белгиледи. Садыр Жапаров бир тууган мамлекеттердин ортосундагы мамилелер бекем пайдубалга негизделгенин эки элдин ортосундагы терең тарыхый жана руханий байланыштар экенин белгиледи.
Президент Садыр Жапаров Кыргызстан кызматташуунун учурдагы жана келечектеги механизмдеринин алкагында өз ара аракеттенүүнү мындан ары өнүктүрүүгө даяр экенин билдирди.
Жолугушууда эки өлкөнүн мамлекет башчылары, Кыргызстан менен Азербайжандын тиешелүү мамлекеттик органдарынын соода-экономикалык, маданий-гуманитардык, энергетикалык жана айыл чарба тармагындагы эки тараптуу кызматташуусунун абалы жана келечеги тууралуу отчетторун угушту.
Кыргыз Республикасынын Президенти Садыр Жапаровдун Азербайжан Республикасына 24-апрелде болгон мамлекеттик сапарынын алкагында бир катар эки тараптуу документтерге кол коюлду.
