18.09.23
Кыргызстан жана Азербайжандын ортосундагы соода алакаларынын өсүшүнө байланышкан маалымат жарыяланды. Ага ылайык, акыркы жарым жылда эки мамлекеттин соодасынын жалпы көлөмү өткөн жылга салыштырмалуу 5 эсеге өскөн.
Азербайжан Бажы комитетинин 2023-жылдын 18-сентябрында жасаган билдирүүсүндө, эки өлкөнүн ортосундагы соода көлөмүнүн өскөндүгү белгиленди. 2023-жылдын январынан 2023-жылдын июлуна чейин Кыргызстан менен Азербайжандын ортосундагы эки тараптуу соода жүгүртүү 22 миллион долларга жеткени маалым болду.
Мындан тышкары, аталган комитет Азербайжандын жакынкы өлкөлөр менен жалпы соодасынын 0,57 пайызга өскөндүгүн билдирди. Азербайжан менен Кыргызстандын ортосундагы соода 2022-жылдын ушул мезгилине салыштырмалуу 5 эсеге (өткөн жылы 4,5 миллион доллар) өскөндүгү жазылган.
Ошондой эле Азербайжандын жалпы соодасындагы Кыргызстандын үлүшү 2023-жылы 0,07 пайызга жеткендиги белгилүү болду. Кыргызстан Азербайжандан 19 миллион долларга товар импорттоп алган. Бул көрсөткүч өткөн 2022-жылдын ушул мезгилине салыштырмалуу 19 эсеге өскөндүгүн билдирет.
