21.05.24
Азербайжандын Губа шаарында Экономика министри Микаил Жаббаров менен Өзбекстандын Инвестиция, өнөр жай жана соода министри Лазиз Кудратовдун катышуусунда “II Азербайжан-Өзбекстан аймактар аралык” форуму өтүүдө.
Бизнес-форумга эки өлкөнүн ишкерлери, бизнес түзүмдөрүнүн жана мамлекеттик органдарынын өкүлдөрү катышууда. Форумдун негизги максаты, өлкөлөр ортосундагы соода-экономикалык байланыштарды кеңейтүү жана ишкерлердин кызматташуусуна жагымдуу шарттарды түзүү болуп саналат.
Форумга ошондой эле айыл чарба, өнөр жай, транспорт жана кайра иштетүү өнөр жайы сыяктуу тармактарда иш алып барган ишкерлер жана ишканалардын жетекчилери катышууда.
Жаббаров форумда сүйлөгөн сөзүндө, Азербайжандын Өзбекстан менен өнөктөштүгү көп тараптуу мүнөзгө ээ экенин жана экономиканын ар кыл тармактарын камтыганын билдирип келип: “Пахтачылык жана жибек чарбасы сыяктуу салттуу тармактарда олуттуу жылыштар болду. Имишли районунда биргелешкен пахта кластерин түзүү боюнча иштер жүрүп жатат. Жалпысынан биз айыл чарба, туризм, кичи жана орто ишканалар жана жүк ташуу сыяктуу түрдүү тармактарда кызматташуунун кеңири күн тартибин иштеп чыктык. Бул багыттар боюнча ишке ашырылып жаткан долбоорлор экономикалык өсүштү стимулдаштырууга, жаңы жумуш орундарын түзүүгө жана өлкөлөрүбүздүн ортосундагы экономикалык байланыштарды чыңдоого багытталган”, - деп белгилеп өттү.
