24.05.24
Кыргызстандын Министрлер кабинетинин Төрагасы Акылбек Жапаров Түркмөнстандын президенти Сердар Бердымухамедов менен жолугушуу учурунда, эки өлкөнүн ортосундагы соода-экономикалык жана инвестициялык мамилелердин потенциалын толук пайдаланууга чакырды. Бул тууралуу, Кыргызстандын Министрлер кабинетинин басма сөз кызматы билдирди.
Көрүшмөдө Акылбек Жапаров эки өлкөнүн соода-экономикалык байланыштарын чыңдоонун маанилүүлүгүн белгилеп, ошондой эле транзиттик транспорт, электр энергиясын импорттоо жана эки тараптуу кызматташуунун башка аспектилерин талкуулашты.
Акылбек Жапаров: “2023-жылы эки өлкөнүн ортосундагы товар жүгүртүү 63,5 миллион долларды түздү. Ошону менен бирге Кыргызстан-Түркмөнстан мамилелеринин пайдаланылбай жаткан олуттуу соода-экономикалык жана инвестициялык потенциалы бар. Өз ара товар айлантуунун көлөмүн мындан ары да көбөйтүү жана спектрин кеңейтүү, үчүнчү өлкөлөрдүн рынокторуна биргелешип чыгуу мүмкүнчүлүктөрүн изилдөө зарыл деп эсептейм”, - деп белгилеп өттү.
Түркмөнстандын президенти Сердар Бердымухамедов өз кезегинде, эки өлкөнүн ортосундагы өз ара пайдалуу кызматташтыкты мындан ары дагы өнүктүрүүгө кызыкдар экенин билдирди.
