14.04.24
Кыргызстан менен Өзбекстандын Тышкы иштер министрлери Жээнбек Кулубаев менен Бахтиер Саидов 14-апрелде Ташкентте “Борбор Азия – Перс булуңунун кызматташтык кеңешинин” Стратегиялык диалогуна мүчө мамлекеттердин Тышкы иштер министрлеринин экинчи жыйынынын алкагында эки тараптуу жолугушуу өткөрдү.
Тышкы иштер министрлигинин басма сөз кызматы билдиргендей, тараптар бир катар маселелерди, анын ичинде энергетика жана транспорт тармагындагы ири инфраструктуралык долбоорлорду эртерээк ишке киргизүүнү талкуулашты.
Жолугушуунун башында тышкы иштер бөлүмдөрүнүн башчылары кыргыз-өзбек кызматташтыгынын актуалдуу маселелерин талкуулап, Кыргызстан менен Өзбекстандын президенттеринин макулдашууларын ишке ашыруунун жүрүшүнө өзгөчө көңүл бурушту. Министрлер ошондой эле эл аралык жана аймактык маселелер боюнча пикир алмашышты.
Сүйлөшүүдө үстүбүздөгү жылы биргелешкен иш-чаралардын алкагында пландалган биргелешкен долбоорлорду ишке ашыруу маселелери каралды. Ошондой эле саммиттин жолугушууларына даярдык көрүү боюнча биргелешкен “Жол картасына” кол коюшту. Алдыда боло турган иш-чаралар мурда жетишилген макулдашууларды бекемдөөгө көмөктөшүп, ар тараптуу стратегиялык өнөктөштүктүн алкагында, кыргыз-өзбек мамилелерин мындан ары өнүктүрүүгө жана бекемдөөгө өбөлгө болору баса белгиленди.
Министрлер өз ара сооданын көлөмү динамикалуу өсүп жатканын, өнөр жай, энергетика, айыл чарба жана башка приоритеттүү тармактарда кызматташуу долбоорлору ийгиликтүү ишке ашырылып жатканын кубаныч менен белгилешти.
Эки тараптын министрлери өзгөчө энергетика жана транспорт тармагындагы ири инфраструктуралык долбоорлорду практикалык ишке ашырууну эртерээк баштоо маселелерин талкуулашты.
